Hezkuntza-igeriketa metodologia bat da, eta hezkuntza eta garapena ditu helburu nagusi, kognitiboa zein mugimenezkoa, igeriketa irakastearen bidez. Hori guztia, “Jolasa” elementu nagusitzat hartuta. Metodologia hau haur-hezkuntzako 1. mailatik Lehen Hezkuntzako 1. mailara bitarteko adinetan aplikatzen da.
Sistema honek haurrek uretako ingurunean dituzten abilezia eta trebetasun guztiak garatzea ahalbidetzen du, estiloen araberako teknikaren garapena bigarren mailan utziz eta garapen ebolutiboan zentratuz.
Metodologia hau nabarmentzen da balioetan hezten baita, eta, aldi berean, igeriketaren oinarrizko nozioak irakasten baitzaizkie. Honela, ikasleek autonomia bat garatzen dute; ez bakarrik uraren barruan, baizik eta arauekiko errespetuan, materialaren zaintzan, eta abar. Gainera, metodologia honen beste zutabe bat saioak hainbat gairekin girotzea da. Horrela, egunero motibazioa sustatzen duen abentura berri bat deskubritzen dute, jolastuz ikasten baitute.
Beraz, pertsonaren alderdi guztiak lantzen dituen metodologia da, bere adinari dagozkion abilezia eta trebetasun guztiak hobetzea lortuz, eta, aldi berean, uretan propultsatzeko moduak, desplazamendu mota desberdinak, urperatzeak aldaera guztiekin eta arnasa hartzeko modu desberdinak irakatsiz. Horrela, ikasleek mugimendu-oinarri on bat eskuratzea lortuko dute, etorkizunean igerian egiteko estiloen alderdi teknikoak azkarrago, dibertigarriago eta eraginkorrago gara ditzaten.
